صہیونی حکومت خطے میں بدامنی کی جڑ ہے، عراقچی کی پاکستانی ہم منصب سے ٹیلیفونک گفتگو

مہر خبررساں ایجنسی کی رپورٹ کے مطابق اسلامی جمہوری ایران کے وزیرخارجہ عباس عراقچی نے پاکستانی نائب وزیراعظم و وزیرخارجہ اسحاق ڈار ٹیلفونک گفتگو کی اور صہیونی حکومت اور ایران کے درمیان جنگ کی تازہ ترین صورتحال پر تبادلہ خیال کیا۔

گفتگو کے دوران ایرانی وزیرخارجہ نے کہا کہ صہیونی حکومت ایران میں سویلین تنصیبات، ایٹمی پلانٹ، رہائشی مکانات، طبی مراکز اور ذرائع ابلاغ کے اداروں کو نشانہ بنارہی ہے۔ صہیونی حکومت ہی خطے میں بدامنی کی جڑ ہے جس کے خلاف بین الاقوامی سطح پر صدائے احتجاج بلند کرنے کی ضرورت ہے۔

انہوں نے کہا کہ ایران نے اقوام متحدہ کی سلامتی کونسل کو اسرائیلی جارحیت کے حوالے سے اس کی ذمہ داریوں کی طرف متوجہ کرایا ہے۔

اس موقع پر اسحاق ڈار نے کہا کہ پاکستان صہیونی حکومت کی جانب سے ایران پر جارحیت کے حوالے سے اپنے اصولی موقف پر قائم ہے اور ان حملوں کی شدید مذمت کرتا ہے۔